कीर्तिमानका लागि सिक्का, सिक्काले गिनिज बुक( फोटो र भिडियो सहित)

इलाम, जेष्ठ २३ – कास्कीको हेम्जा २ का रामबहादुर परियारको आधा उमेर जुत्ता सिलाउनमा बित्यो । जीवनभर विवाहसम्म नगरी एक्लो संघर्ष गरेका परियारले जुत्ता सिलाएर कमाएको रकममध्ये आधाजति गरिबको सेवामा बिताए । अहिले उनको दैनिकी फेरिएको छ । उनीसँग सियो र धागोको सट्टा जीउमा १० केजीको भारी छ । त्यो पनि पैसाको । उनलाई देख्दा धेरैले अचम्म मान्छन् । तर उनको लक्ष्य प्रस्ट छ, ‘शान्ति र संविधानका लागि विश्वका सबै राष्ट्रको सिक्का जम्मा गरेर गिनिज बुकमा नाम लेखाउने ।’

सदरमुकामको मुख्यचोकमा बुधबार दिउँसो भेटिएका परिवारलाई हेर्न ठूलो भीड जम्मा भएको थियो । भीडबीचमा उभिएका परियारलाई आफ्नो उद्देश्य बताउन भ्याइनभ्याई थियो । आफूलाई सिक्का बाबा भन्न रुचाउने परियार आफ्नो उद्देश्य आयआर्जन नभएर नितान्त भिन्न र मुलुकको हितका लागि भएको दाबी गर्छन् ।

आठ महिनादेखि निरन्तर उनी यो अभियानमा जुटेका छन् । उनले १ सय ४० देशका सिक्का जम्मा गरेर लगाएको दाबी गरेका छन् । ‘सबै राष्ट्रको सिक्का जम्मा गरेपछि सिंहदरबार जान्छु,’ उनले भने, ‘सरकारले सर्टिफिकेट दिएपछि विश्व भ्रमणमा निस्कने योजना छ ।’ परियारले इतिहासकालदेखि नेपाली मोहरहरू संकलन गरेका छन् । उनको अभियानलाई सकारात्मक मान्नेले आफूसँग भएको देश-विदेशको सिक्का दिने गरेको बताए । उनले नेपालको झन्डासमेत साथमा नै लिएर हिँड्ने गरेका छन् ।

पोखराको पर्यटकीय क्षेत्रमा बसेर उनले जुत्ता सिलाउने काम गरेका रहेछन् । त्यहाँ बसेकाले अंग्रेजी राम्ररी बोल्न सक्ने बताउने परियार विश्व भ्रमणमा जाँदा भाषा समस्या नपर्ने दाबी गरे । रामबहादुरले अहिलेसम्म मुलुकका ५३ जिल्ला घुमिसकेका छन् । हरेक जिल्ला सदरमुकाम पुग्ने उनको लक्ष्य छ । ‘मलाई आर्थिक लोभ छैन,’ उनी भन्छन्, ‘नयाँ काम गरेर नेपालको नाम विश्वमा चिनाउन चाहन्छु ।’

हरेक जिल्लामा प्रहरीसँग समन्वय गरेर बस्ने गरेका उनी त्यो हुन नसके आफ्नै गोजी रित्याउँछन् । उनको अभियानलाई साथ दिन चाहनेले सानोतिनो रकम दिने गरेकाले खर्च धान्ने गरेको उनले बताए । सुरक्षाका दृष्टिले उनी संवेदनशील छन् ।