बाँदरले दिने हैरानी हाम्रालागि नौलो होइन । हामीकहाँ बाँदरले प्रायः सर्वसाधारण मानिसलाई दुख दिइरहेको छ । तर भारतमा भने बाँदरले राष्ट्रपति भवन, संसद भवन जस्ता ठूला मान्छेका घर ताकेपछि सरकारले नयाँ जुक्ति अपनाएको छ ।
बाँदरका फौजले महत्वपूर्ण सरकारी कार्यालयहरुमा पसेर हैरान पार्न थालेपछि नयाँ दिल्ली महानगर काउन्सिलले मानिसलाई ढेँडु बाँदर बनाउने काइदा अपनाएको छ । ४० जना मानिसलाई ढेँडु बाँदर बनाएर बाँदर भगाउन परिचालन गरिएको छ ।

रंगरोगन तथा पहिरनले ढेँडु बनाइएका ती मानिसहरुले बाँदरका फौजलाई धपाउने गरेका छन् । यिनहरुको काम पनि अनौठो नै छ । यिनीहरु सधै हाइ अलर्टमा हुन्छन् र जुन ठाउँमा बाँदरले हैरान पार्छ उनीहरुलाई फोन गरेर बोलाइन्छ अनि उनीहरुले उत्पात मच्चाइरहेका बाँदरलाई भगाउँछन् । सायद मान्छे भन्ने चिनेको भए बाँदर उल्टै झम्टिन्थे होलान् तर ढेँडुको भेषमा आएका मानिसलाई देखेर बाँदरले साँच्चीकै ढेँडु ठान्छन् र सुइँकुच्चा ठोक्छन् ।

ढेँडु बनेर बाँदर धपाउने काममा संलग्न प्रमोद नामका मानिसका अनुसार सुरुमा उनीहरुले उत्पात मच्चाइरहेका बाँदरको संख्या एकिन गर्छन् । त्यसपछि बाँदर रहेको नजिकैको रुख वा पर्खालमा गएर ढेँडुले जस्तै आवाज निकालेर कराउँछन् । त्यो आवाज सुनेर रातो बाँदर डराउन थाल्छन् । जब बाँदर डराएजस्तो गरेर अतालिन्छन् तब ती मानव ढेँडु दौडिँदै बाँदरका फौजमाथि जाइ लाग्छन् र धपाउँछन् । यति गर्दा पनि नभागेमा उनीहरुले गुलेली र लाठीको मद्धतले बाँदर धपाउने गरेका छन् ।
बाँदर धपाउने काममा संलग्न मानव लंगूरलाई महिनाको साढे ७ हजार तलब दिइएको छ । पहिले पहिले साँच्चीकै ढेँडु पालेर बादर लखेटिने गरेको भएपनि अहिले सरकारले ढेँडु पाल्न रोक लगाएको हुनाले मान्छेलाई ढेँडु बनाएर बाँदर धपाउनु परेको बादर भगाउने कामको ठेक्का लिएका ठेकेदार नारायण नाथ बताउँछन् ।

एक जना अर्बपति धनाढ्यले आफ्नी प्रेमिकाको जन्मदिनमा चुरोट उपहार दिए । कस्तो बुद्धु रहेछ, जन्मदिनमा पनि चुरोट उपहार दिने ? भन्ने लाग्ला तपाइँलाई । तर त्यो चुरोट कुनै लरतरो चुरोट होइन । एउटा खिल्लीकै झण्डै ९ करोड रुपैयाँ मूल्य पर्ने चुरोट हो त्यो ।



हो, लण्डनमा बस्ने रुसका एक धनाढ्यले आफ्नी गर्लफ्रेण्डको बर्थडेमा उपहार दिनका लागि ८ करोड ७३ लाख नेपाली रुपैयाँ पर्ने हिरा र सुन जडित विद्युतिय चुरोट निर्माणका लागि कारखानालाई अर्डर गरे । लण्डनको सिसा स्टिक्स नामको एक कम्पनीले २४६ वटा २ क्यारेटका हिराका टुक्रा, अन्य बहुमुल्य पत्थर, ६ क्यारेटको ओभल डायमण्ड तथा २४ क्यारेट सुनको बटन तथा बहुमुल्य सिसाको पाइपसमेत जडान भएको विद्युतिय चुरोट ४ महिना लगाएर तयार गर्यो । उनले त्यो इ चुरोट साढे ५ लाख पाउण्डमा किनेर आफ्नी गर्लफ्रेण्डको जन्मदिनमा उपहार दिए । ती धनाढ्य रुसी पुरुष र उनकी भाग्यमानी प्रेमिकाको नाम भने खुलाइएको छैन । यो विषयमा एक बेलायती टेलिभिजनमा विशेष कार्यक्रम नै प्रस्तुत भयो ।

उक्त चुरोटको नाम सिसा स्टिक्स सोफिया राखिएको छ । यो बहुमुल्य चुरोट बनाउने कम्पनीका एन्थोनी मिक्सिडेजले यस्तो चुरोट बनाउनु आफुहरुको लागि सपना जस्तै भएको बताए ।